Türkmenistanyň adam hukuklary babatda halkara borçnamalarynyň we halkara ynsanperwer hukugynyň ýerine ýetirilmegini üpjün etmek boýunça pudagara toparyň mejlisi

2025-nji ýylyň 14-nji fewralynda Türkmenistanyň DIM-nde Türkmenistanyň adam hukuklary babatda halkara borçnamalarynyň we halkara ynsanperwer hukugynyň ýerine ýetirilmegini üpjün etmek boýunça pudagara toparyň mejlisi geçirildi.

Mejlisiň işine Türkmenistanyň Daşary işler ministrliginiň, Bilim ministrliginiň, Saglygy goraýyş we derman senagaty ministrliginiň, şeýle hem beýleki pudak edaralaryň ýolbaşçylary we wekilleri, Türkmenistanyň Adalatçysy, Türkmenistanyň Döwlet, hukuk we demokratiýa institutynyň, Türkmenistanyň Gyzyl Ýarymaý Milli jemgyýetiniň hem-de jemgyýetçilik guramalaryň ýolbaşçylary gatnaşdylar.

Gün tertibine laýyklykda, toparyň 2024-nji ýylda ýerine ýetiren işleriniň netijelerine garaldy hem-de «Halkara parahatçylyk we ynanyşmak ýyly» diýlip yglan edilen 2025-nji ýylda öňde goýlan wezipeler ara alnyp maslahatlaşyldy.

Hasabat döwründe ýerine ýetirilen işleriň netijelerini ara alyp maslahatlaşmagyň barşynda çykyş edenler raýatlaryň kanuny bähbitleriniň halkara hukugyň umumy ykrar edilen kadalaryna laýyklykda goralmagynyň Bitarap Türkmenistanyň döwlet syýasatynyň ileri tutulýan ugurlarynyň biri bolup durýandygyny bellediler.

Halkara ynsanperwer hukugy boýunça Türkmenistan bilen Halkara Gyzyl Haç Komitetiniň arasyndaky hyzmatdaşlyk barada pikir alyşyldy.

«Türkmenistanda adam hukuklary boýunça 2021 – 2025-nji ýyllar üçin Hereketleriň milli meýilnamasynyň», «Türkmenistanda gender deňligi boýunça 2021 – 2025-nji ýyllar üçin Hereketleriň milli meýilnamasynyň», «Türkmenistanda çagalaryň hukuklaryny durmuşa geçirmek boýunça 2023 – 2028-nji ýyllar üçin Hereketleriň milli meýilnamasynyň» durmuşa geçirilmegi bilen baglanyşykly meselelere garaldy.

Pikir alyşmalaryň çäginde bellenilişi ýaly Pudagara toparyň ileri tutuýan wezipeleriniň arasynda ilatyň hukuk bilimliligini ýokarlandyrmak, hukuk maglumatlaryna elýeterliligi giňeltmek meselelerine aýratyn üns berilýär.

Şonuň bilen birlikde, Türkmenistanyň kanunçylygynyň milli tejribeleri, şeýle hem halkara hukugynyň umuy ykrar edilen kadalaryny nazara almak bilen yzygiderli kämilleşdirilýändigi beýan edildi.

Mejlisde başga-da birnäçe meselelere garaldy.