«Awaza» milli syýahatçylyk zolagynda Türkmenistanyň Maýa goýum Forumy (TIF 2025) öz işine başlady

2025-nji ýylyň 18-nji sentýabrynda «Awaza» milli syýahatçylyk zolagynda Türkmenistanyň Maýa goýum Forumy (TIF 2025) resmi taýdan açyldy. Bu iri çäre ýurduň maýa goýum mümkinçiliklerini ara alyp maslahatlaşmak üçin 800-den gowrak daşary ýurtly we ýerli wekilleri jemledi.

Forum «Strategik netijeliligi üpjün edýän faktor hökmünde Türkmenistanyň maýa goýum taýdan özüne çekijiligi» atly plenar mejlis bilen başlady. Mejlisde moderator hökmünde BMG-niň Türkmenistandaky Hemişelik utgaşdyryjysy Dmitriý Şlapaçenko çykyş etdi.

Esasy çykyşlar bilen dünýäniň görnükli bilermenleri çykyş etdiler. Olaryň hatarynda Bütindünýä bankynyň ýerine ýetiriji direktory Beatris Lus Maser Mallor we onlaýn görnüşde gatnaşan BMG-niň Baş sekretarynyň orunbasary Rabab Fatima çykyş etdiler.

Türkmenistanyň Maliýe we ykdysadyýet ministri Mämmetguly Astanagulow daşary ýurt maýa goýumlaryny çekmek we durnukly ykdysady ösüşi üpjün etmek boýunça hökümet strategiýasyny beýan etdi.

Plenar mejlisiň çäklerinde Türkmenistanyň Daşary işler ministriniň orunbasary Ahmet Gurbanow çykyş etdi. Ol öz sözünde ýurdumyzy halkara işewürlik üçin ynamdar hyzmatdaş edýän esasy faktorlary görkezdi hem-de Türkmenistanyň maýa goýum özüne çekijiliginiň onuň ösüş strategiýasy we daşary syýasaty bilen gönüden-göni baglanyşyklydygyny nygtady.

BMG-niň Baş sekretarynyň orunbasary Rabab Fatima Awazadaky Maýa goýum forumynyň gatnaşyjylarynyň öňünde wideoýüzlenme bilen  çykyş edip, deňze çykalgasy bolmadyk ösüp barýan ýurtlaryň  bähbitlerini öňe sürmekde Türkmenistanyň öňdebaryjy ornuna ýokary baha berdi we maýa goýumlaryny çekmäge gönükdirilen BMG-niň täze başlangyçlaryny hödürledi.

Forumyň iki gününiň dowamynda ykdysadyýetiň ileri tutulýan ugurlaryna bagyşlanan mowzuklaýyn mejlisler geçiriler.

TIF 2025-iň guramaçylary hökmünde Türkmenistanyň Maliýe we Ykdysadyýet ministrligi hem-de Türkmenistanyň Daşary işler ministrligi çykyş edýär.