TÜRKMENISTANYŇ PREZIDENTI GURBANGULY BERDIMUHAMEDOWA PAKISTANYŇ ÖŇDEBARYJY UNIWERSITETINIŇ “SYÝASY YLYMLARYŇ HORMATLY DOKTORY” DIÝEN ALYMLYK DEREJESI GOWŞURYLDY

16-njy martda Pakistan Yslam Respublikasynyň Prezidentiniň “Aiwan-e Sadr” Köşgünde Türkmenistanyň Prezidentine “Kayd-e-Azam” uniwersitetiniň “Syýasy ylymlaryň hormatly doktory” diýen alymlyk derejesini gowşurmak dabarasy boldy.

Türkmenistanyň Prezidenti we Pakistan Yslam Respublikasynyň Prezidenti “Aiwan-e Sadr” Köşgüniň bäşinji gatyna çykdylar hem-de ýörite bellenilen otaga bardylar. Bu ýerde iki döwletiň Baştutanlaryny “Kayd-e-Azam” uniwersitetiniň prorektory jenap Jawed Aşraf mähirli garşylady.

            Salamlaşykdan soňra ýokary okuw mekdebiň prorektory Dabaralar zalyna geçmegi haýyş etdi. Hormat garawulynyň ugratmagynda Türkmenistanyň Prezidenti we Pakistan Yslam Respublikasynyň Prezidenti zala girdiler we sahnada ýörite bellenilen ýerlere geçip oturdylar.

            Iki ýurduň Döwlet senalary ýaňlandy. Soňra mejlisler zalynda Türkmenistanyň Prezidentine Pakistan Yslam Respublikasynyň “Kayd-e-Azam” uniwersitetiniň  “Syýasy ylymlaryň hormatly doktory” diýen alymlyk derejesini gowşurmak dabarasy boldy.

            Şanly waka mynasybetli bu ýere Pakistanyň ylmy jemgyýetçiliginiň wekilleri, uniwersitetiň professorlary, mugallymlary, talyplary, şeýle hem Türkmenistanyň resmi wekiliýetiniň agzalary ýygnandylar.

            Soňra uniwersitetiň prorektory Jawed Aşraf  dabaraly çäräni açyp,  bu ýere ýygnananlaryň adyndan belent mertebeli myhmany mähirli mübärekledi we bu ýere ýygnananlary Türkmenistanyň Prezidentiniň uly möçberli ylmy işleri bilen tanyşdyrdy.

            Soňra ýokary okuw mekdebiň alymlyk geňeşiniň agzalary tarapyndan Türkmenistanyň Prezidenti Gurbanguly Berdimuhamedowa “Kayd-e-Azam” uniwersitetiniň  “Syýasy ylymlaryň hormatly doktory” diýen alymlyk derejesini dakmak hakynda kabul eden çözgüdi okaldy. Türkmen lideri bu hormatly ada türkmen we pakistan haklarynyň arasyndaky dostlukly doganlyk gatnaşyklaryny berkitmäge goşan ägirt uly şahsy goşandy, ylym we bilim ulgamynda ikitaraplaýyn gatnaşyklary ösdürmekde bitiren hyzmatlary üçin mynasyp boldy.

            Bu ýere ýygnananlaryň el çarpyşmagy bilen Pakistanyň Prezidenti Mamnun  Huseýn türkmen liderine degişli diplomy gowşurdy.

            Soňra söz gezegi Türkmenistanyň Prezidenti Gurbanguly Berdimuhamedowa berildi. Türkmen Lideri bu ýere ýygnananlar bilen mähirli salamlaşyp, Päkistan Yslam Respublikasynyň Prezidenti Mamnun Huseýne we Kaid-e-Azam uniwersitetiniň ýolbaşçylaryna “Syýasy ylymlaryň hormatly doktory”diýen ýokary derejeli ylmy adyň berlendigi üçin, tüýs ýürekden minnetdarlyk bildirdi.

            Prezident Gurbanguly Berdimuhamedow öz çykyşynda bu belent ylmy ady bütin adamzadyň bähbitleri ugrunda ýadawsyz zähmet çekýän ähli türkmen halkynyň bitiren hyzmatyna berlen ýokary baha, şeýle hem, iki ýurduň arasyndaky doganlyk gatnaşyklarynyň ýokary derejä çykandygynyň subutnamasy hökmünde kabul edýändigini belledi. Türkmen  Lideriniň çykyşy uly üns bilen diňlenildi we  şowhunly el çarpyşmalar bilen garşylandy.